កម្មវិធីសប្បុរសធម៌ បរិច្ចាគសម្ភារសិក្សា និងស្បៀងអាហារជូនសិស្សខ្វះខាតនៅខេត្តកំពត និងខេត្តកែប

ថ្វីត្បិតតែនេះមិនមែនជាប្រធានបទថ្មី តែទាំងនេះជាសកម្មភាពទើបតែកើតឡើងថ្មីៗ ដែលក្រុមហ៊ុន អាយ អេស អាយ ស្ទៀល (ISI STEEL) បានបន្តការចូលរួមចំណែកជួយដល់សង្គម​ជាតិកម្ពុជា ជាពិសេសគឺបានជួយលើកស្ទួយកុមារកំពុងជួបបញ្ហាខ្វះខាតនៅតាមតំបន់មួយចំនួនក្នុងខេត្តកំពត និងខេត្តកែប។ យើងពិតជាមានក្តីសោមនស្សរីករាយណាស់ ដែលសកម្មភាពទាំងនេះមានការចូលរួម និងគាំទ្រដោយដេប៉ូដៃគូចែកចាយផលិតផលរបស់យើង ហើយថែមទាំងមានដេប៉ូមួយចំនួនបានបរិច្ចាគជាថវិកា​ សម្ភារសិក្សា និងសម្ភារប្រើប្រាស់មួយចំនួន ដែលជាផ្នែកនៃការលើកកម្ពស់ការអប់រំ និងជីវភាពរបស់សិស្សក្នុងតំបន់នោះបន្ថែមទៀត ។ គួររំលឹកផងដែរថាក្រុមហ៊ុន អាយ អេស អាយ ស្ទៀល (ISI STEEL) មានគុណតម្លៃស្នូលសំខាន់ ៣ គឺ “ភាពឧស្សាហ៍ព្យាយាម សុចរិតភាព និង គំនិតច្នៃប្រឌិត” ដែលជាមូលដ្ឋានគ្រឹះជួយឲ្យក្រុមហ៊ុនឈរបានរឹងមាំ។ នៅក្រុមហ៊ុន អាយ អេស អាយ ស្ទៀល (ISI STEEL) យើងបានចាត់ទុកធនធានមនុស្សជាកត្តាសំខាន់បំផុតនូវរាល់អ្វីគ្រប់យ៉ាង ព្រោះពួកគេជាគ្រឹះនៃភាពជោគជ័យរបស់ក្រុមហ៊ុន។ ដូច្នេះហើយក្រុមហ៊ុនតែងតែជឿជាក់ក្នុងការវិនិយោគលើការពង្រឹងសមត្ថភាពយុវជន និងផ្តល់ក្តីសង្ឃឹមដល់ពួកគេឲ្យខិតខំសិក្សារៀនសូត្រ ដើម្បីអាចបង្កើតបាននូវគំនិតច្នៃប្រឌិតថ្មីៗ សម្រាប់ជាប្រយោជន៍ជួយដល់សង្គម។

ក្នុងខែឧសភា ឆ្នាំ២០២៣ កន្លងទៅនេះ ក្រុមហ៊ុន អាយ អេស អាយ ស្ទៀល (ISI STEEL) បានធ្វើការបរិច្ចាគសម្ភារសិក្សា និងចំណីអាហារជូនដល់អង្គការ សាលារៀន និងមណ្ឌលកុមារកំព្រារចំនួន ៤ កន្លែងផ្សេងៗគ្នា ដោយក្នុងនោះក្រុមហ៊ុនបានបរិច្ចាគទៅកាន់៖

• អង្គការជុំគ្រៀល ខេត្តកំពត៖ ផ្តល់ជាសម្ភារសិក្សា និងអាហារសម្រន់ ស្មើនឹងទឹកប្រាក់ចំនួន ៣១៥៩ ដុល្លារ

• សាលាបឋមសិក្សា ពោធិវង្ស ខេត្តកំពត៖ ផ្តល់ជាសម្ភារសិក្សា និងអាហារសម្រន់ ស្មើនឹងទឹកប្រាក់ចំនួន ១៣១៣ ដុល្លារ

• អង្គការវិទ្យាស្ថានអភិវឌ្ឍន៍វប្បធម៌ខ្មែរ ខេត្តកំពត៖ ផ្តល់ជាគ្រឿងបរិភោគ និងសម្ភារប្រើប្រាស់ប្រចាំថ្ងៃ ស្មើនឹងទឹកប្រាក់ចំនួន ២៧៤០,៥០ ដុល្លារ

• បុរីកុមារ ខេត្តកែប៖ ផ្តល់ជាគ្រឿងបរិភោគ និងសម្ភារប្រើប្រាស់ប្រចាំថ្ងៃ ស្មើនឹងទឹកប្រាក់ចំនួន ១៩៩៤,២៥ ដុល្លារ

ក្រៅពីការបរិច្ចាគនូវគ្រឿងបរិភោគ និងសម្ភារប្រើប្រាស់ផ្សេងៗ ក្រុមហ៊ុនក៏បានផ្សារភា្ជប់សកម្មភាពសប្បុរសធម៌នៅតាមកន្លែងទាំងនេះ ដោយការដាំដើមឈើ ដើម្បីចូលរួមចំណែកថែរក្សាបរិស្ថាន និងជាសារពញ្ញាក់ស្មារតីប្រជាពលរដ្ឋឱ្យចូលរួមថែរក្សាព្រៃឈើ ក៏ដូចជាបណ្តុះគំនិតដល់យុវជនជំនាន់ក្រោយឱ្យចេះស្រលាញ់ធម្មជាតិផងដែរ។

ក្រុមហ៊ុន អាយ អេស អាយ ស្ទៀល (ISI STEEL) បានចាប់កំណើតចេញពីអាជីវកម្មលក្ខណៈគ្រួសារតូចមួយក្នុងឆ្នាំ១៩៩៧ ប៉ុន្តែដោយការប្រតិបត្តិប្រឹងប្រែងឆ្ពោះទៅមុខឈរលើគុណតម្លៃស្នូល ភាពឧស្សាហ៍ព្យាយាម សុចរិតភាព និង គំនិតច្នៃប្រឌិត ទើបអាចអភិវឌ្ឍខ្លួនក្លាយជាក្រុមហ៊ុនឈានមុខគេក្នុងឧស្សាហកម្មកែច្នៃ និងចែកចាយផលិតផលដែកសម្រាប់សំណង់ដែលមានគុណភាព និងមានភាពច្នៃប្រឌិតខ្ពស់នៅកម្ពុជា។ ទាំងអស់នេះហើយ ជាអ្វីដែលក្រុមហ៊ុនអាចចូលរួមចំណែកធ្វើដើម្បីប្រទេសជាតិយើង។